Өмнөд Африкт жижиг, дунд үйлдвэрүүд (SME) нийт бизнесийн 98%-ийг бүрдүүлж, 2.4–3.5 сая орчим байдаг. Тэд нийт ажлын байрны 66%-ийг бий болгож, орон нутгийн эдийн засагт чухал үүрэг гүйцэтгэдэг. Гэсэн ч эдгээр байгууллагууд байгаль орчинд ээлтэй, тогтвортой үйл ажиллагааг хэр хэрэгжүүлж байгаа талаар мэдээлэл хомс байжээ.
Судлаачид 2017–2024 оны хооронд Йоханнесбургийн хөрөнгийн биржийн AltX дээр бүртгэлтэй 27 жижиг, дунд компанийн тайланг судалж, тэдний тогтвортой байдлын хандлагыг шинжилсэн байна. Судалгаагаар SMEs тогтвортой практик нэвтрүүлэх эсэх нь гурван гол хүчин зүйлээс хамаардаг нь тогтоогджээ. Үүнд ногоон санхүүжилтийн талаарх мэдлэг, уур амьсгалын өөрчлөлтөд дасан зохицох хүсэл, мөн тогтвортой хөгжлийн ач холбогдлыг ойлгож байгаа эсэх орно.
Уур амьсгалын өөрчлөлтийн эрсдэлд бэлэн байх нь жижиг бизнесүүдэд чухал. Хэт халалт, усны хомсдол, нийлүүлэлтийн саатал зэрэг эрсдэлийг ойлгосон компаниуд илүү идэвхтэй арга хэмжээ авч, сэргээгдэх эрчим хүч ашиглах, ус хэмнэх технологи нэвтрүүлэх зэрэг алхмууд хийж байна. Энэ нь зөвхөн байгаль орчноо хамгаалахаас гадна бизнесээ урт хугацаанд авч үлдэхэд ч чухал юм.
Мөн судалгаагаар мэдлэг, мэдээлэл маш чухал нөлөөтэйг онцолжээ. Тогтвортой хөгжлийн талаар ойлголттой бизнесүүд ийм практик нэвтрүүлэх магадлал өндөр байдаг ч олон SMEs тодорхой, найдвартай мэдээлэл дутмаг байгаагаас болж идэвхгүй хэвээр байна. Энэ мэдлэгийн зөрүүг арилгавал илүү олон бизнес байгальд ээлтэй шийдэлд шилжих боломжтой.
Ногоон санхүүжилт дангаараа хангалтгүй гэдгийг судалгаа харуулсан. Зарим бизнесүүд санхүүгийн боломжийг мэддэг ч техникийн мэдлэг, дотоод чадавх, дэмжлэг дутмаг байдлаас болж хэрэгжүүлж чаддаггүй. Иймээс зөвхөн санхүүжилт бус, практик зөвлөгөө, сургалт, дэмжлэг шаардлагатай байна.
Сонирхолтой нь, саад бэрхшээлээ ил тод хүлээн зөвшөөрч буй бизнесүүд аль хэдийн тогтвортой байдлыг судалж, хэрэгжүүлэх талаар бодож эхэлснийг илтгэдэг. Энэ нь тэд шийдэл хайхад илүү бэлэн байгааг харуулж байна.
Цаашид засгийн газар, санхүүгийн байгууллага, их сургуулиуд хамтран SMEs-д зориулсан сургалт, мэдээллийн хөтөлбөр хэрэгжүүлэх, ногоон санхүүжилтийг илүү хүртээмжтэй болгох, зөвшөөрлийн процессыг хялбаршуулах шаардлагатай. Ингэснээр жижиг, дунд бизнесүүд тогтвортой хөгжлийг бодитоор хэрэгжүүлэх боломж нэмэгдэх юм.
Эх сурвалж : The Conversation
