Зүүн Өмнөд Азийн орнууд болон Японоос ирсэн залуу манлайлагчид Филиппиний нийслэл Манила хотноо чуулж, бүс нутгийн эдийн засгийн хамтын ажиллагаанд залуучуудын инновац, энтрепренершипийг төвд нь авч үзсэн чухал уулзалтад оролцлоо. ASEAN Youth Economic Forum 2026 буюу ASEAN-ы Залуучуудын Эдийн Засгийн Форум 2-р сарын 10-нд Century Park Hotel зочид буудалд нээлтээ хийсэн бөгөөд гурван өдрийн турш үргэлжилж байна.
“Ирээдүйг бат бөх болгоё: ASEAN-Японы ЖДҮ-ийг хөгжүүлэхэд залуучуудын инновац” уриан дор болж буй энэхүү форумд залуу мэргэжилтнүүд, бизнес эрхлэгчид болон бодлого боловсруулагчид оролцож, жижиг, дунд үйлдвэрлэл эрхлэгчид (ЖДҮ) хэрхэн өөрчлөгдөж буй эдийн засгийн орчинд өрсөлдөх чадвараа хадгалж, тогтвортой хөгжих талаар хэлэлцэж байна.
Нээлтийн үеэр Японы Элчин сайдын яамны Эдийн засгийн асуудал хариуцсан сайд Наобуми Ёкота залуучууд урт хугацааны эдийн засгийн өсөлтөд чухал үүрэгтэйг онцлон тэмдэглэлээ. Тэрээр инновацлаг санаа, зоригтой үйлдэл нь өсөлтийн гол түлхүүр бөгөөд залуучууд бол нийгэм, эдийн засгийн хөгжлийг урагшлуулах гол хүч гэдгийг хэлсэн байна.
ASEAN-ы бүс нутгийн эдийн засгийн гол тулгуур болсон ЖДҮ-үүд нийт бизнесийн дийлэнх хувийг бүрдүүлж, ажлын байрны ихэнхийг бий болгодог. Гэсэн хэдий ч бодлогын дэмжлэг, нөөц боломжийн хязгаарлалт зэрэг бүтцийн хүндрэлүүдээс шалтгаалан өсөлт, өрсөлдөх чадварт нь саад тулгарсаар байна.
Масайоши Тамура залуучуудын дуу хоолойг бүс нутгийн хэлэлцүүлэгт илүүтэй тусгах нь эдгээр асуудлыг шийдвэрлэхэд чухал болохыг онцолжээ. Түүний хэлснээр шинэ үеийнхний шинэлэг сэтгэлгээ, бүтээлч хандлага нь бодитой, хүртээмжтэй шийдлийг бий болгоход чухал үүрэг гүйцэтгэнэ.
Форумын уур амьсгалыг тодорхойлсон илтгэлдээ Сара Раузаана эдийн засгийн хөгжлийг илүү хүртээмжтэй, тогтвортой болгохын тулд системийн өөрчлөлт шаардлагатайг онцолсон байна. Тэрээр залуучууд зөвхөн тогтвортой хөгжлийн бэлгэ тэмдэг бус, харин бодлого тодорхойлох, шийдвэр гаргах түвшинд идэвхтэй оролцогч байх ёстойг онцолжээ.
Энэ удаагийн форум нь ASEAN болон Японы эдийн засгийн хамтын ажиллагаанд ЖДҮ-ийг гол байр сууринд авч үзэж, залуучуудын санаачилга, инновац, бодлогын оролцоо нь бүс нутгийн интеграцчилал, бизнесийн тогтвортой байдлыг бэхжүүлэхэд чухал нөлөөтэйг харуулж байна.
ASEAN, Японы Эдийн засаг, худалдаа, аж үйлдвэрийн яам болох METI болон AMEICC зэрэг байгууллагууд хамтран зохион байгуулж буй энэхүү арга хэмжээ нь бүс нутгийн залуучуудын хамтын ажиллагааг гүнзгийрүүлэх, эдийн засгийн шинэ гарцуудыг нээхэд чиглэж байна.
Эх сурвалж : The Philbiz News
