Бейрут хотноо 2026 оны 2 дугаар сарын 16-нд Ливан улс бичил, жижиг, дунд бизнесүүдийг дэмжих зорилготой Үндэсний Худалдааны Нэгдсэн Тусламжийн төвийг албан ёсоор нээлээ. Энэхүү санаачилгыг Ливаны Эдийн засаг, худалдааны яам удирдан хэрэгжүүлж, НҮБ-ын Хөгжлийн хөтөлбөр дэмжин, Канад улсын санхүүжилтээр боломжтой болсон байна.
Нээлтийн арга хэмжээнд Амер Бисат, Грегори Галлигэн, Блерта Алико болон худалдаа, аж үйлдвэрийн танхимууд, хувийн хэвшлийн төлөөлөл оролцжээ.
Шинээр байгуулагдсан тус төв нь бизнес эрхлэгчдэд зориулсан зөвлөгөө авах онлайн захиалгын систем, дотоод болон гадаад зах зээлд үйл ажиллагаа явуулах талаар практик мэдээлэл, мөн танхимуудтай хамтран үзүүлэх чиглэсэн дэмжлэгийг санал болгож байна. Жижиг, дунд бизнесүүд ганцаарчилсан зөвлөгөө, сургалт, интерактив семинарт хамрагдаж, зах зээлд нэвтрэхэд тулгардаг саадыг даван туулах боломжтой болжээ.
Тус үйлчилгээ нь онлайнаар болон биечлэн хосолсон хэлбэрээр ажиллах бөгөөд Бейрут, Триполи, Бекаа бүсүүдэд шууд үйлчилгээ үзүүлэхээс гадна цаашид өмнөд бүсэд нэвтрүүлэхээр төлөвлөсөн байна. Энэ нь улс даяар бизнес эрхлэгчдэд тэгш хүртээмжтэй үйлчлэх боломжийг бүрдүүлж байгаа юм.
Нээлтийн үеэр сайд Амер Бисат хэлэхдээ, энэхүү төв нь дан ганц төсөл биш, харин Ливаны бизнесийн орчныг сайжруулах өргөн хүрээний шинэчлэлийн нэг хэсэг гэдгийг онцолсон байна. Тэрээр мэдээллийн тэгш бус байдлыг бууруулах, зохицуулалтын ил тод байдлыг нэмэгдүүлэх, дижитал шилжилтийг урагшлуулах замаар бизнесийн өрсөлдөх чадварыг бэхжүүлнэ гэж мэдэгджээ.
Харин Канад улсын элчин сайд Грегори Галлигэн Ливаны бизнесүүдэд чадвар, хүсэл эрмэлзэл хангалттай байдаг ч тэднийг дэмжих систем чухал гэдгийг дурдсан байна. Тэрээр энэ төрлийн институцийн бэхжилт нь Ливаныг дэлхийн зах зээлд өрсөлдөхөд бэлтгэж буйг илтгэнэ гэж тэмдэглэжээ.
НҮБ-ын Хөгжлийн хөтөлбөрийн суурин төлөөлөгч Блерта Алико энэхүү платформ нь жижиг, дунд бизнесүүдэд худалдааны нарийн төвөгтэй үйл явцыг ойлгож, шинэ зах зээлд гарахад чухал дэмжлэг болно хэмээн онцолсон байна. Ливаны эдийн засгийн 50 гаруй хувийг бүрдүүлдэг энэ салбарыг дэмжих нь эдийн засгийн сэргэлтэд чухал ач холбогдолтой гэж тэрээр нэмж хэлжээ.
Ийнхүү Үндэсний Худалдааны Тусламжийн төв байгуулагдсанаар Ливаны жижиг, дунд бизнесүүдэд бодит дэмжлэг үзүүлж, тэдний зах зээлийн хүрээг тэлэх, бүс нутгийн болон олон улсын түвшинд өрсөлдөх чадварыг нэмэгдүүлэхэд чухал алхам болж байна.
Эх сурвалж : UNDP Lebanon
