Boost Bank нь Малайзын анхны дотоодын дижитал банк бөгөөд 2026 оны Malaysia Technology Excellence Awards 2026-ийн “AI – Санхүүгийн үйлчилгээ” төрөлд түрүүлсэн байна. Энэхүү шагнал нь бичил, жижиг, дунд бизнесүүдэд санхүүжилтийн хүртээмжийг нэмэгдүүлэхэд чиглэсэн тус банкны шинэлэг арга барилыг үнэлжээ.
Тус шагнал нь Boost Bank хиймэл оюун ухаанд суурилсан харилцагчийн урьдчилсан шалгаруулалт болон өгөгдөлд суурилсан зээлийн үнэлгээг ашиглан уламжлалт санхүүгийн системд бүрэн хамрагдаж чаддаггүй бизнесүүдэд санхүүжилтийг илүү хялбар, хурдан, хүртээмжтэй болгохыг зорьж буйг онцолсон юм.
Малайзын эдийн засагт бичил, жижиг, дунд бизнесүүд чухал байр суурь эзэлдэг бөгөөд ДНБ ийн 39.5 хувийг бүрдүүлдэг. Гэсэн хэдий ч эдгээр бизнесүүд санхүүжилт авахдаа бичиг баримтын их шаардлага, удаан хугацааны шалгалт, хатуу үнэлгээний загвар зэрэг олон саадтай тулгардаг хэвээр байна.
Үүний хариуд Boost Bank санхүүжилтийн үйл явцыг хурд, хүртээмж, бизнесийн бодит хэрэгцээнд нийцүүлэн шинэчлэн, дижитал төвтэй загварыг нэвтрүүлсэн байна. Тус банк барьцаа шаарддаггүй, 1 сая ринггит хүртэлх хэмжээтэй, 36 сар хүртэл хугацаатай зээлийг санал болгохын зэрэгцээ эргэлтийн зээлийн уян хатан бүтээгдэхүүнээр дамжуулан бизнесүүдэд ажиллах хөрөнгийн хүртээмжийг нэмэгдүүлж байна.
Түүнчлэн тус банк уламжлалт зээлийн шалгуураас давж, гүйлгээний мэдээлэл болон хэрэглэгчийн зан төлөв зэрэг нэмэлт өгөгдлийг ашиглан зээлдэгчийн чадварыг илүү өргөн хүрээнд үнэлж байгаа нь онцлог юм. Ингэснээр илүү хүртээмжтэй зээлийн шийдвэр гаргах боломж бүрдэж, эрсдэлийн хяналтыг зэрэг хадгалж чаддаг байна.
Энэхүү шинэчлэлийн нэг чухал хэсэг нь 2025 онд нэвтрүүлсэн AI дуут туслах Bunga юм. Bunga нь боломжит харилцагчидтай эхний шатанд харилцаж, зөвшөөрөл авч, банкны шалгуурт нийцсэн урьдчилсан үнэлгээний үйл явцаар чиглүүлэх үүрэгтэй бөгөөд цаашид олон бүтээгдэхүүн, хэл дээр өргөжих боломжтой бүтэцтэй юм.
2025 оны 12 дугаар сарын байдлаар Boost Bank нийт 370 сая ринггитээс дээш хэмжээний зээлийг олгосон бөгөөд Bunga систем нэвтэрснээс хойш ердөө гурван сарын дотор 1 сая ринггитийн зээлийн хүсэлтийг боловсруулсан байна. Энэ нь тус банкны дижитал шийдлийн үр ашиг болон бизнес эрхлэгчдийг дэмжих зорилгыг илтгэж байна.
Энэхүү шагнал нь санхүүгийн үйлчилгээний салбар дахь инноваци нь зөвхөн технологийн дэвшил биш, харин банкны үйлчилгээг илүү хүртээмжтэй, уян хатан, бодит хэрэгцээнд нийцсэн болгоход чиглэх ёстойг харуулж байна. Malaysia Technology Excellence Awards нь технологийн инноваци, дижитал шилжилтийг манлайлагч байгууллагуудыг үнэлдэг бөгөөд Малайзын эдийн засгийн өсөлтөд чухал үүрэг гүйцэтгэдэг шагнал юм.
