Бизнес эрхлэгчдэдээ татварын шинэчлэлийн хүрээнд хэрэгжих “Зөвлөн туслах” шинэ соёлын талаарх мэдээллийг онцлон хүргэж байна.
2026 оноос эхлэн татварын байгууллага нь зөвхөн хяналт тавьдаг байгууллага биш, харин бизнес эрхлэгчдэд заавар зөвлөгөө өгдөг “Хамтрагч” болон өөрчлөгдөж байна.
Захиргааны дарамтыг халж, итгэлцлийг бэхжүүлнэ
Өмнө нь татварын тайлангийн алдаа бүр торгууль, шийтгэл дагуулдаг байсан бол шинэ хуулийн төслөөр дараах өөрчлөлтүүд хийгдлээ:
Алдаагаа засах боломж: Бизнес эрхлэгч та тайлангаа ямар нэгэн захиргааны шийтгэлгүйгээр 2 жилийн хугацаанд өөрийн санаачилгаар залруулах эрхтэй болов.
Зөвлөн туслах үйлчилгээ: Татварын байгууллагаас “Эрсдэлд суурилсан хяналт” гэхээсээ илүүтэйгээр, ААН-үүдэд тулгарч буй санхүүгийн хүндрэлийг даван туулах арга замыг зааж өгөхөд анхаарна.
Хариуцлагатай татвар төлөгчийг урамшуулах тогтолцоо
Татварын шинэ соёл нь “Хариуцлагатай” байхыг чухалчилж байна.
Татвар төлөлтийн түүх цэвэр, хариуцлагатай ААН-үүдэд НӨАТ-ын төлөлтийг 2 сар хүртэл хойшлуулах зэрэг давуу эрхүүдийг олгож эхэллээ.
Энэ нь бизнес эрхлэгчдэд бэлэн мөнгөний (cash flow) дутагдалд орохгүйгээр эргэлтийн хөрөнгөө удирдах боломжийг олгож буй хэрэг юм.
Нийслэлийн ЖДҮҮДТ НӨҮГ-ЫН оролцоо
Бид татвар төлөгч болон төрийн хоорондын гүүр болж ажиллахын тулд:
Татварын боловсрол: Шинэ хуулийн хэрэгжилт, хөнгөлөлтөд яаж хамрагдах талаарх цуврал сургалт, зөвлөгөөг үнэ төлбөргүй үзүүлнэ.
Ил тод байдал: Захиргааны ямар нэгэн дарамт, шахалт ирсэн тохиолдолд бизнес эрхлэгчдийн эрх ашгийг хамгаалах чиглэлээр хамтран ажиллана.
Бизнес эрхлэгч танд: “Татвар төлөх нь зөвхөн үүрэг биш, харин таны бизнесийг хамгаалах, тогтвортой хөгжих баталгаа юм. Шинэ соёлд нэгдэж, алдаагаа засах боломжийг бүрэн ашиглаарай.”
Эх сурвалж: Нийслэлийн жижиг, дунд үйлдвэрлэл, үйлчилгээг дэмжих төв НӨҮГ
